البدايه كانت فالمتوسطه , بدت الحبوب تطلع خفيفه عالخدين , مافكرت اعالجها لانها كانت خفيفه , مع الوقت بدأت تزيد وانتقلت للجبهه واختفت من الخدود يعني بين كم شهر تطلع حبه ع الخد , طبعا أنا كنت فمرحله حساسه وقتها وكانت جداً جداً مأثره على نفسيتي , كنت أقص قصتي قصيره عشان تغطي الحبوب واستمر هالشي معي الين الثانويه كانت أمنيتي ارفع شعري واحط هد باند :( مستحيل مستحيل يعرف هالشعور غير شخص جربه :( .. المهم بدأت اعالج في ثالث متوسط ..
المحاوله الأولى ..
رحت لدكتوره في مستوصف الاستشاري هو مستوصف متخصص بالتجميل .. اعطتني علاجات موضعيه ومضاد مااذكرها والله لكنها كانت غاليه زي اغلب علاجات البشره وكريماتها , وقعدت استخدمها فتره ماكان في اي نتيجه تذكر للأسف ..
المحاوله الثانيه ..
حولت لطبيبه ثاني في نفس المستوصف برضوا صرفت لي علاجات موضعيه وخفت الحبوب شوي لكن رجعت اسوأ , خبرتني الدكتوره عن الروكتان .. وشرحت عن اعراضه و و و طبعا امي خافت ورفضت استخدمه .. وراجعت عندها كم مره وبعده تركت العلاج لانو ماكان في نتيجه ..
المحاوله الثالثه ..
بعد فتره رحت لدكتوره ثانيه كانت امي تعالجت عندها من الاكزيما , اعطتني مضاد وصابونه .. الصابونه فضيعه فالبدايه كان وجهي يفرق على طوول لما اغسله بها بس بعد فتره رجعت الحبوب بشكل حاد لدرجة صارت تطلع فوق بعضها .. رحت للدكتوره وخلاص قررت لي الروكتان , سوت لي تحاليل كثير كلى ووضائف الكبد و والدهون في الدم واشياء كثيره , كانت التحاليل مكلفه نوعاً ما , وطبعاً شهرياً ارجع اعيدها , المهم حللت ولما رحت اخذ النتيجه قالت لي في شي فالكلى ولازم تعيدين التحاليل .. انا خفت وطلعت وماعاد رجعت لها ..
المحاوله الرابعه ..
بعد فتره رجعت افكر بالموضوع كنت وقتها قريت عن الروكتان في النت وقريت تجارب كثير واصريت وقتها اني ماابغى اعالج بغيره لو كتب لي غيره مارح استخدم , سافرت للأردن وكان في دكتور اسمه عميش عميش بروفيسور معروف في الجلديه والتناسليه , رحت له وخلاص كانت الحاله تأزمت جدا كشف علي وقال انو الاطباء عادة يتدرجون بالعلاج والبدايه تكون بالكريمات الكوضعيه بس حالتك واضح انها محتاجه للروكتان سوا لي تحاليل ماكلفتني 150 ريال ووزني وقاس طولي وشرح لأمي ان حب الشباب فيني وراثي من جهة أبوي , وطلعت نتيجة تحاليلي سليمه وقال لي ماتحتاجين تعيدين التحاليل شهرياً , وصرف لي الروكتان و واقي شمس ومرطب ومقشر ..
الروكتان ..
الروكتان هي حبوب مكونه من فيتامين A .. لعلاج حب الشباب المزمن .. بالنسبه لأغلب الاطباء هو
الحل
الأخير لعلاج حب الشباب , لأنه من الادويه الخطره والي لها اعراض جانبيه كثيره و اضرار , الجرعه تتحدد على حسب وزنك ..
جرعتي ..
50 G مقسومه على فترتين , بعد الغدا حبه 10G وحبه 20G لانو مافي 30G وبعد العشا 20 G
اعطاني معاها ورقة تحذيرات بخصوص الحمل .. والورقه حق الدواء ماتقصررر ..
الأعراض اللي مريت فيها ..
* أول مابديت استخدمه من اول اسبوع تعبت من عظامي كانت مفاصلي تعورني وظهري و قفصي الصدري لدرجة كان التنفس يعورني ! أمي وقتها خافت وقالت خففيه , دقيت عالدكتور قال لي لو خففتيه رح يرجع ومافي اي فايده من العلاج .. استمريت وبعد اسبوعين تقريبا بدا يخف بس ماراح تماماً ..
* جف شعري مره :( .
* كان أنفي على طول ينزل منه دم بسبة الجفاف وعيوني كانت جافه بس حل هالمشكلتين بسيط قطرة عين و وبخاخ مرطب للأنف ..
* يديني كانت كل فتره تتحس وطلعت لي بقع بنيه كانت تحرقني شوي , لكنها ترجع تخف وتختفي , وبعد ترك العلاج اختفت تماماً
الاعراض اللي مريت فيها مو شرط يمر فيها غيري .. يمكن لانو جرعتي كبيره , ويمكن جسمي ماتحمل الدوا , شخص عن شخص يفرق ..
النتيجه :
بالنسبه للحبوب جفت واول شهرين كانت نادرا تطلع , اما الشهرين الثانيه بشرتي فرقت 180 درجه كذا البشره فيها نظاره مو طبيعيه يعني فرق ووااااضحح .. والحبوب طبعا اختفت تماااااماا .. لكن ركبتي صار فيها زي الخشونه حتى لما اطلع الدرج كانت تطلع صوت وشعري جف وصار تعبان مررره ..
وبعد ماخلص الكورس العلاجي قعدت حول 6 شهور اذا طلعت حبه تطلع مره بالشهر اذا طلعت ..
وفجأه .. رجعت الحبوب :( مارجعت بحدتها أول لكنها رجعت وكانت تجي فتره وتجي كثير بعدين تخف وتختفي وترجع تطلع شوي وكذا يعني مو مستمره مثل اول لكنها تحولت لحبوب تحت الجلد علما اني ماكنت اعرفها الي تحت الجلد .. المشكله كنت على وجه زواج والنفسيه لعبت دور وجات على قبل زواجي والتهبت مراا ,
المحاوله الخامسه :
على طول قلت بعيد الروكتان واذا تزوجت بستخدم مانع حمل المهم تروح وقتها كان كل تفكيري كييف تروحح رحت للدكتور سعيد الشامي في مستشفى رعايه الوطني في الملز , أفضل دكتور تعاملت معاه , كشف علي وقال انها ملتهبه بس رح تخف ان شاء الله وقال لي مارح اكتب لك روكتان الروكتان مضر ورح يأثر عليك وأنتي اصلا جسمك نحيف ووو وقال لي تغذي زين ومن هالكلام
سوا لي تنضيف بشره وكتب لي كريمين يخففون التهيج وبعده بأسبوعين رحت له ..
اعطاني كريم اسمه جاما هيدروكسي هذي صورته ..
واعطاني غسول فضيع اسمه سيتافيل هذي صورته ..
, اختي كانت تستعمله قبل يكتبه الدكتور بس انا كتب لي حق البشره الحساسه ..
الكريم فضضييع هو اساساً مقشر لكن بتقنيه مختلفه عن المقشرات الثانيه استخدمته لمدة شهر قبل زواجي وكان فضيع خفف الحبوب جداً وجا زواجي وعدا على خير الحمد لله ..
وتركت الكريم للأسف وبرجع له ان شاء الله .. الحبوب لسه تطلع لي بين فتره والثانيه بس تعتبر أقل يعني .. احيان كثير واحيان وحده وكذا .. على حسب النفسيه :))
بعد فتره من زواجي تعبت ورحت لدكتورة نساء وولاده الصدمه وقتها ان طلع عندي تكيس فالمبايض ..
يعني حب الشباب اللي لي سنين في صراع معاه كان يبغى له حل لمشكلته الاساسيه اللي هي التكيس ولخبطة الهرمونات مو حل مشكلة الحبوب بس لان السبب الرئيسي لها موجود فمافي فايده من علاجها لانها بترجع ..
وصفت لي الدكتوره جلوكوفاج ( ميتفورمين ) وبديت في رحلة علاج التكيس .. صار لي شهرين الحين اعالج التكيس بشرتي شبه اختفت الحبوب منها حتى الاثار بدت تقل اعطتني الدكتوره فيتامينات مع الجلوكوفاج .. والحمد لله اني عرفت السبب والحمدلله على كل حال ..
السؤال الي من عرفت ان عندي تكيس وانا ودي اعرف جوابه ..
معقوله ولا دكتور من اللي رحت لهم اعالج عندهم شك ان عندي تكيس مبايض ؟!!!!
المهم طولت عليكم لكن حبيت اعطيكم قصتي كامله ..
انتظروا البوست الجاي :) , تعليقاتكم رأيكم ونقدكم يسعدني ..
